FIFA kongressida tashkilot rahbari Janni Infantino, shuningdek, Falastin va Isroil vakillari ishtirokida mojaro yuz berdi. Bu haqda Championat nashri xabar berdi.

Tadbir davomida Infantino tomonlarni ramziy ma’noda yarashtirmoqchi bo‘lib, futbol federasiyalari rahbarlarini bir-birining qo‘lini siqishga chaqirdi. Biroq Falastin futbol assosiasiyasi prezidenti Jibril Rajub bu taklifni rad etdi va “Biz azob chekmoqdamiz” deya sahnani tark etdi.

Keyinroq Rajub “genosid sodir etayotgan fashist hukumati vakilining qo‘lini siqish niyatida emasligini” ta’kidladi.

Shuningdek, Falastin futbol federasiyasi rahbari Isroil terma jamoasi va klublarini xalqaro musobaqalardan chetlatmaslik qarori yuzasidan Sport arbitraj sudiga (CAS) murojaat qilganini ma’lum qildi.

Joriy yilning aprel holatiga ko‘ra, 2023 yil oktyabridan beri Isroil hujumlari oqibatida kamida 73,459 nafar falastinliklar halok bo‘lgan. G‘azo Sog‘liqni saqlash vazirligi ma’lumotlariga ko‘ra, qurbonlarning 80 foizini tinch aholi tashkil etadi. Shuningdek, urush davomida 270 nafar jurnalist va media xodimi, 120 nafar akademik hamda 560 dan ortiq gumanitar yordam xodimi halok bo‘lgan.