FIFA конгрессида ташкилот раҳбари Жанни Инфантино, шунингдек, Фаластин ва Исроил вакиллари иштирокида можаро юз берди. Бу ҳақда Championat нашри хабар берди.
Тадбир давомида Инфантино томонларни рамзий маънода яраштирмоқчи бўлиб, футбол федерациялари раҳбарларини бир-бирининг қўлини сиқишга чақирди. Бироқ Фаластин футбол ассоциацияси президенти Жибрил Ражуб бу таклифни рад этди ва “Биз азоб чекмоқдамиз” дея саҳнани тарк этди.
Кейинроқ Ражуб “геноцид содир этаётган фашист ҳукумати вакилининг қўлини сиқиш ниятида эмаслигини” таъкидлади.
Шунингдек, Фаластин футбол федерацияси раҳбари Исроил терма жамоаси ва клубларини халқаро мусобақалардан четлатмаслик қарори юзасидан Спорт арбитраж судига (CAS) мурожаат қилганини маълум қилди.
Жорий йилнинг апрель ҳолатига кўра, 2023 йил октябридан бери Исроил ҳужумлари оқибатида камида 73,459 нафар фаластинликлар ҳалок бўлган. Ғазо Соғлиқни сақлаш вазирлиги маълумотларига кўра, қурбонларнинг 80 фоизини тинч аҳоли ташкил этади. Шунингдек, уруш давомида 270 нафар журналист ва медиа ходими, 120 нафар академик ҳамда 560 дан ортиқ гуманитар ёрдам ходими ҳалок бўлган.













