Madridning «Real» klubi bosh murabbiyi Alvaro Arbeloa o‘z jamoasi futbolchilari haqidagi fikrlari bilan o‘rtoqlashdi. Ispaniyalik mutaxassis shu yilning yanvar oyida Xabi Alonsoning o‘rniga kelgan edi, biroq muammoli mavsumni qutqarib qola olmadi: «qaymoqranglilar» Chempionlar ligasida muvaffaqiyatsizlikka uchrashdi va Ispaniya Kubogini erta tark etishdi. La Ligada esa «Barselona»dan ancha orqada qolib, chempionlik uchun matematik imkoniyatlarini yo‘qotish arafasida turibdi.

Jurnalistlar barcha muvaffaqiyatsizliklar fonida Arbeloadan «Real» futbolchilaridan hafsalasi pir bo‘lgan-bo‘lmaganini so‘rashdi.

«Albatta yo‘q. Men ularni omma oldida himoya qilaman va mening taqdirim ularning ko‘rsatayotgan o‘yinlariga bog‘liq. Bu murabbiyning burchidir. Ko‘pchilik futbolchilar bilan juda yaqin munosabatdaman va har qanday muammo oramizda qolishi kerak. Men har doim ularning birinchi himoyachisi bo‘lib qolaman», — dedi murabbiy matbuot anjumanida.

Yakshanba kuni «Real» safarda «Espanyol»ga qarshi maydonga tushadi.