«Manchester Yunayted» sardori Brunu Fernandesh o‘tgan yozda nima uchun klubni tark etmaganini tushuntirib berdi.
«Gap faqat sodiqlikda emas. Men ikki yil oldin ketishim mumkin edi, uch yil oldin ketishim mumkin edi, o‘tgan mavsumda ham ketishim mumkin edi, lekin menga bu yerda bo‘lish juda yoqadi.
O‘ylaymanki, ushbu klub bilan muvaffaqiyatga erishish — boshqa hech qaysi klubda ololmaydigan narsamdir. Dunyodagi boshqa biror jamoadan bunchalik quvonch va o‘zim istagan barcha narsani ololaman deb o‘ylamayman.
Muxlislar buni qanchalik istayotganini, ular qanchalik ehtirosli ekanini bilaman. Klubning avvalgi mavqeiga qaytishini ular qanchalik kutayotganidan xabarim bor. Biz hammamiz bir qayiqdamiz. Men bu qayiq shunchaki joyida turmay, oldinga harakat qilishini istayman.
Ha, men Angliya liga kubogi va Angliya kubogini yutdim, ammo biz hali klub, muxlislar, shaxsan o‘zim va butun jamoa istagan narsaga erishganimiz yo‘q. Shartnomam tugagunga qadar harakat qilishdan to‘xtamayman.
Olti yil oldin klub menga ishonib bu yerga olib keldi va jamoaga yordam bera olishimga ishondi. Mening qolish haqidagi qarorim bu yerda hali orzularimni amalga oshira olmaganim bilan bog‘liq.
Men o‘zim xohlagan hamma narsaga hali erishganim yo‘q. Klub bilan Premyer-liga va Chempionlar Ligasida g‘olib chiqishni istayotganimni hech qachon yashirmaganman. Balki bunga erisharman, balki yo‘q. Lekin imkoniyatim bor ekan yoki shu yerda ekanman — harakat qilaveraman.
Bu qiyin bo‘ladimi? Ha. Ligada ko‘p yillardan beri chempionlikni qo‘lga kiritayotgan va barqaror ravishda yetakchilar qatorida yurgan top-klublar bor, biz esa hozircha unday emasmiz», — dedi Brunu Gari Nevill bilan suhbatda.
