«Манчестер Юнайтед» сардори Бруну Фернандеш ўтган ёзда нима учун клубни тарк этмаганини тушунтириб берди.

«Гап фақат содиқликда эмас. Мен икки йил олдин кетишим мумкин эди, уч йил олдин кетишим мумкин эди, ўтган мавсумда ҳам кетишим мумкин эди, лекин менга бу ерда бўлиш жуда ёқади.

Ўйлайманки, ушбу клуб билан муваффақиятга эришиш — бошқа ҳеч қайси клубда ололмайдиган нарсамдир. Дунёдаги бошқа бирор жамоадан бунчалик қувонч ва ўзим истаган барча нарсани ололаман деб ўйламайман.

Мухлислар буни қанчалик истаётганини, улар қанчалик эҳтиросли эканини биламан. Клубнинг аввалги мавқеига қайтишини улар қанчалик кутаётганидан хабарим бор. Биз ҳаммамиз бир қайиқдамиз. Мен бу қайиқ шунчаки жойида турмай, олдинга ҳаракат қилишини истайман.

Ҳа, мен Англия лига кубоги ва Англия кубогини ютдим, аммо биз ҳали клуб, мухлислар, шахсан ўзим ва бутун жамоа истаган нарсага эришганимиз йўқ. Шартномам тугагунга қадар ҳаракат қилишдан тўхтамайман.

Олти йил олдин клуб менга ишониб бу ерга олиб келди ва жамоага ёрдам бера олишимга ишонди. Менинг қолиш ҳақидаги қарорим бу ерда ҳали орзуларимни амалга ошира олмаганим билан боғлиқ.

Мен ўзим хоҳлаган ҳамма нарсага ҳали эришганим йўқ. Клуб билан Премьер-лига ва Чемпионлар Лигасида ғолиб чиқишни истаётганимни ҳеч қачон яширмаганман. Балки бунга эришарман, балки йўқ. Лекин имкониятим бор экан ёки шу ерда эканман — ҳаракат қилавераман.

Бу қийин бўладими? Ҳа. Лигада кўп йиллардан бери чемпионликни қўлга киритаётган ва барқарор равишда етакчилар қаторида юрган топ-клублар бор, биз эса ҳозирча ундай эмасмиз», — деди Бруну Гари Невилл билан суҳбатда.