Ўзбекистон миллий терма жамоаси йил охирида Ироқда ўтказилиши режалаштирилаётган тўрт терма жамоа иштирокидаги турнирда қатнашиши мумкин.
Арабларнинг WinWin нашри маълумотига кўра, Ироқ футбол федерацияси Басра шаҳрида 9–17 ноябрь кунлари халқаро турнир ўтказишни режалаштирмоқда. Мусобақа терма жамоаларнинг бўлажак халқаро учрашувларга тайёргарлиги доирасида ташкил этилади.
Турнирда иштирок этиш учун Эрон биринчи бўлиб таклифни қабул қилган. Эрон терма жамоаси штаби ушбу мусобақани юқори даражадаги ўқув-машғулот йиғини ўтказиш ва рақобатбардош назорат учрашувларида иштирок этиш учун яхши имконият сифатида баҳоламоқда.
Маълумотларга кўра, Россия терма жамоаси ҳам мазкур тўртликдан жой олиши кутилмоқда.
Шунингдек, Ироқ футбол федерацияси Ўзбекистон футбол федерацияси билан музокараларни бошлаган. Манбага кўра, Ўзбекистон томони мусобақада иштирок этишга принципиал розилик билдирган.
Бироқ ҳозирча турнир иштирокчиларининг барчаси бўйича расмий тасдиқ эълон қилинмаган.
