Bugun O‘zbekiston Superligasining 11-turidan o‘rin olgan o‘yinlar yakunlanadi. Kun doirasida Qarshining “Nasaf” klubi Zominda Namanganning “Navbahor” jamoasini qabul qiladi.

“Nasaf” jamoasi uchun mavsum omadli boshlanmadi. “Ajdarlar” chempionat doirasida o‘tgan 10 ta o‘yinning 3 tasida g‘alaba qozonishni uddaladi. Shuningdek, 4 ta bahsda raqiblari bilan murosa yo‘lini tanladi. Jamoa ayni vaqtda 13 ochko bilan turnir jadvalida 9-o‘rinni egallab turibdi.

Timur Kapadze boshqaruvidagi “Navbahor” esa 10 ta o‘yinning 6 tasida g‘alaba qozonishni uddaladi. Shuningdek, “So‘g‘diyona” jamoasiga qarshi o‘yinda durang natija qayd etildi. “Lochinlar” ayni vaqtda 19 ochko bilan turnir jadvalida 5-o‘rinni egallab turibdi.

Mazkur jamoalar Superliga doirasida o‘tgan so‘nggi ikki o‘yinda bir xil natijalar qayd etishdi. “Nasaf” jamoasi “Lokomotiv”ga mag‘lub bo‘lib, safarda “Paxtakor” bilan durang o‘ynadi. “Navbahor” esa 9-turda “So‘g‘diyona” bilan durang o‘ynadi, 10-turda esa “Bunyodkor”ga mag‘lub bo‘ldi.

Ushbu jamoalar o‘rtasida o‘tgan mavsum Qarshida bo‘lib o‘tgan o‘yinda Dragan Cheran tomonidan kiritilgan yagona gol evaziga “Nasaf” jamoasi g‘alaba qozongan. Namanganda o‘tgan bahs esa golsiz durang bilan yakunlangan edi.

Xo‘sh, bugun qanday natija qayd etiladi? “Nasaf” o‘z mezbonligi ostida o‘tadigan o‘yinda g‘alaba qozonib, kuchlilar safiga qaytadimi? Yoki “Navbahor” safarda g‘alaba qozonib, kuchli uchlikka qaytadimi? Bu savolga bugun soat 20:00 da start oladigan o‘yinni tomosha qilish orqali javob topamiz.