«Pari Sen-Jermen» Myunxenda «Bavariya» bilan durang o‘ynab (1:1), Chempionlar ligasining ikkinchi finalchisiga aylandi. Parijliklar o‘z maydonlaridagi 5:4 hisobidagi g‘alaba evaziga umumiy 6:5 hisobida ustun kelishdi. Finalda Fransiya grandi londonning «Arsenal» jamoasiga qarshi bahs olib boradi («kanonirlar» «Atletiko»ni ikki o‘yin natijasiga ko‘ra 2:1 hisobida mag‘lub etgan).

Shunday qilib, kubok uchun kechadigan hal qiluvchi bahsda ikki ispaniyalik murabbiy — Luis Enrike va Mikel Arteta to‘qnash kelishadi. Opta ma’lumotlariga ko‘ra, bu Chempionlar ligasi tarixida vatandosh murabbiylar finalda o‘zaro ro‘baru kelayotgan to‘rtinchi holatdir. 2003 yilda dunyo italiyalik Marchello Lippi va Karlo Anchelotti dueliga guvoh bo‘lgan bo‘lsa, 2013 va 2020 yillarda kubok nemis mutaxassislari o‘rtasida o‘ynalgan: avvaliga Yupp Xaynkes Yurgen Kloppga qarshi, keyin esa Xans-Diter Flik Tomas Tuxelga qarshi.

Joriy mavsum finali 30 may kuni bo‘lib o‘tadi.