Madridning «Real» klubi kiyinish xonasi ichidagi «shpionlar»ni izlashni boshladi. Bu haqda El Pais nashri xabar berdi.

Klub rahbariyati ayrim futbolchilarning xatti-harakati va OAVga ma’lumotlar doimiy ravishda sizib chiqishidan qattiq norozi. «Real» ichida kimdir ataylab ichki ma’lumotlarni tarqatib, klub imijiga zarar yetkazmoqchi degan fikr bor.

Futbolchilarning o‘zi ham axborot tarqatayotgan shaxslar borasida bir-biridan shubhalana boshlagan. Hatto jamoa ichida asosiy «gumondorlar» guruhi ham shakllangani aytilmoqda.

Avvalroq Federiko Valverde va Orelyen Chuameni mashg‘ulot vaqtida mushtlashib ketgani haqida xabarlar tarqalgan edi. Undan oldin esa futbolchilar bosh murabbiy Alvaro Arbeloadan norozi ekani aytilgan. Shuningdek, jamoada Kilian Mbappega nisbatan munosabat ham yomonlashayotgani xabar qilingan.