Мадриднинг «Реал» клуби кийиниш хонаси ичидаги «шпионлар»ни излашни бошлади. Бу ҳақда El Pais нашри хабар берди.
Клуб раҳбарияти айрим футболчиларнинг хатти-ҳаракати ва ОАВга маълумотлар доимий равишда сизиб чиқишидан қаттиқ норози. «Реал» ичида кимдир атайлаб ички маълумотларни тарқатиб, клуб имижига зарар етказмоқчи деган фикр бор.
Футболчиларнинг ўзи ҳам ахборот тарқатаётган шахслар борасида бир-биридан шубҳалана бошлаган. Ҳатто жамоа ичида асосий «гумондорлар» гуруҳи ҳам шакллангани айтилмоқда.
Аввалроқ Федерико Вальверде ва Орельен Чуамени машғулот вақтида муштлашиб кетгани ҳақида хабарлар тарқалган эди. Ундан олдин эса футболчилар бош мураббий Альваро Арбелоадан норози экани айтилган. Шунингдек, жамоада Килиан Мбаппега нисбатан муносабат ҳам ёмонлашаётгани хабар қилинган.













