«Real Madrid» sobiq yarim himoyachisi Luish Figu jamoadagi vaziyat haqida o‘z fikrlarini bildirdi.

Kecha Federiko Valverde va Orelyen Tchuameni jamoa mashg‘uloti paytida mushtlashib ketgani haqida xabar berilgan edi. Natijada Valverde shifoxonaga yuborilgan va unga choklar qo‘yilgan. Jamoadoshlar o‘rtasidagi kelishmovchilik bir kun avval boshlangan edi. Mushtlashuvdan so‘ng klub zudlik bilan favqulodda yig‘ilish o‘tkazdi.

Konflikt haqida

«Real»da yuz bergan voqea — normal holat emas. Bu kabi maskanda bunday ishlar sodir bo‘lmasligi kerak, garchi bu birinchisi ham, oxirgisi ham bo‘lmasa-da. Kiyinish xonasidagi tushkunlik vaqtlarida bunday vaziyatlar yuzaga kelishi mumkin. 30 kishini boshqarish oson emas, ba’zan yo‘l qo‘yilmasligi kerak bo‘lgan xatolar bo‘lib turadi».

Joze Mourinyoning ehtimoliy qaytishi haqida

«Mening davrimda u tarjimonim, murabbiy yordamchisi, bosh murabbiy va do‘stim bo‘lgan. Men hech qachon uni haddan tashqari hukmron murabbiy deb his qilmaganman.

To‘g‘risini aytsam, klub va u yerdagi muhitni bilgan holda, Mourinyo kerak deb o‘ylamayman», — dedi Figu.