Londonning «Arsenal» klubi bosh murabbiyi Mikel Arteta darvozabon David Rayyaning ko‘rsatayotgan o‘yinlari haqida o‘z fikrlari bilan o‘rtoqlashdi. «Kanonirlar» posboni ketma-ket uchinchi marta Premyer-liganing «Oltin qo‘lqop» sovrinini o‘zi uchun kafolatlab qo‘ydi.

«David — istisnoviy futbolchi. Bizga kelib qo‘shilgan ilk kunlaridanoq ko‘rsatayotgan barqarorligi — shunchaki aql bovar qilmas darajada. Ehtimol, buni hech kim, jumladan, men ham kutmagandim. U ishonib bo‘lmas darajaga chiqdi va hammani o‘zining ishonchli o‘yinlariga shunchalik o‘rgatib qo‘ydiki, endilikda uning ba’zi qahramonliklari oddiy holdek qabul qilinmoqda», — deya Artetaning so‘zlarini keltiradi jurnalist Konnor Xamm.

Yakshanba kuni «Arsenal» Premyer-liga doirasida safarda «Vest Xem»ga qarshi bahs olib boradi.