Lissabonning «Sporting» klubi hujumchisi Luis Suares Portugaliyani tark etib, tumanli Albionga ko‘chib o‘tishi mumkin. Bu haqda Record nashri xabar bermoqda.

Jurnalistlarning ma’lumotiga ko‘ra, 28 yoshli futbolchining transferiga «Nyukasl» qiziqish bildirmoqda. Suaresning «sherlar» bilan shartnomasida belgilangan tovon puli miqdori 80 million yevroni tashkil etadi. Uning Portugaliya top-klubi bilan amaldagi kelishuvi 2030 yilning iyun oyi oxirigacha mo‘ljallangan.

Portugaliya chempionatining joriy mavsumida kolumbiyalik hujumchi 30 ta uchrashuvda maydonga tushdi. Suares o‘z hisobiga 26 ta gol va 6 ta golli uzatmani yozdirib qo‘ydi.