Лиссабоннинг «Спортинг» клуби ҳужумчиси Луис Суарес Португалияни тарк этиб, туманли Альбионга кўчиб ўтиши мумкин. Бу ҳақда Record нашри хабар бермоқда.
Журналистларнинг маълумотига кўра, 28 ёшли футболчининг трансферига «Ньюкасл» қизиқиш билдирмоқда. Суареснинг «шерлар» билан шартномасида белгиланган товон пули миқдори 80 миллион еврони ташкил этади. Унинг Португалия топ-клуби билан амалдаги келишуви 2030 йилнинг июнь ойи охиригача мўлжалланган.
Португалия чемпионатининг жорий мавсумида колумбиялик ҳужумчи 30 та учрашувда майдонга тушди. Суарес ўз ҳисобига 26 та гол ва 6 та голли узатмани ёздириб қўйди.
