«Liverpul» klubi rahbariyati jamoaning asosiy darvozaboni Alisson Beker o‘rniga munosib nomzod izlamoqda. Braziliyalik posbon yozgi transfer oynasida klubini o‘zgartirishi va faoliyatini Turinning «Yuventus» jamoasida davom ettirishi mumkin.

TuttoJuve nashri bergan ma’lumotlarga ko‘ra, «mersisaydliklar» uchun birinchi raqamli tanlov — ayni damda jamoa tarkibida bo‘lgan gruziyalik Georgiy Mamardashvili hisoblanadi. Shuningdek, ingliz klubi qiziqishlari doirasida «PSJ» a’zosi Lyuka Shevalye va «Aston Villa» posboni Emiliano Martines ham bor.

Ma’lumot uchun, Alisson «Liverpul» sharafini 2018 yil yozidan beri himoya qilib kelmoqda. 33 yoshli braziliyalikning amaldagi shartnomasi 2027 yilning iyun oyi yakunida nihoyasiga yetadi. Uning bozor qiymati hozirda 17 million yevroga baholanmoqda.