“Sho‘rtan” – “Andijon” (1:3) uchrashuvidan keyingi matbuot anjumanining ikkinchi qismida mezbonlar ustozi Asror Aliqulov savollarga javob qaytardi.

- O‘zbekiston Kubogi doirasidagi “Andijon”ga qarshi o‘yinda bir qancha futbolchilarga dam berib, o‘yin amaliyotiga ega bo‘lmayotgan futbolchilarni maydonga tushirdik. Ammo, baribir maqsadimiz kurash taklif qilish, yaxshi futbol namoyish qilish va faqat g‘alaba edi. Birinchi bo‘limda biroz ustunlikni berib qo‘ydik. Ikkinchi bo‘limdagi o‘yin uchun yigitlarga rahmat aytaman. Hujumga hujum bilan javoblar qaytardik, yaxshi vaziyatlar yaratdik. Mag‘lubiyatga uchragan bo‘lsak ham ikkinchi bo‘limdagi o‘yin uchun futbolchilarga minnatdorchilik bildiraman.

- Himoya to‘rtligining harakatlariga qanday izoh berasiz?

- Standart holatda kiritilgan gollar...Birinchi golda to‘p autga chiqib ketdi, bizga uzoqroqdan chiqib ketgandek ko‘rindi. Futbolchi yaqinroq joydan to‘pni o‘yinga kiritdi va futbolchilarimiz bu holatga tayyor emasdilar. Menga tushunarsizroqdek ko‘rindi. Ikkinchi gol standart vaziyatdan keyin kiritildi. Darvozabonimiz ishonchsizroq harakat qildi. O‘yin amaliyoti kamroq, Superliga jamoasiga qarshi o‘yinda hayajon demaymanu, ozroq mahorat yetishmadi. Umumiy olganda, uchta to‘p o‘tkazib yubordik va bu himoyani maqtaydigan holat emas.

- Bugungi tarkibni sharoitdan kelib chiqib tushirishga majbur bo‘ldingizmi yoki tanlovingiz shundaymidi?

- Ayrim futbolchilarda kichik jarohatlar bor. Qaysidir tomonlama o‘zimiz tanladik. Boshqa o‘yinchilarga ham imkoniyat berishga harakat qildik. Har bir olingan futbolchi “Sho‘rtan” libosini kiydimi, buni his qilishi kerak-da. Oldimizga qo‘yilgan maqsad bor va shunga mos o‘yin ko‘rsatish kerak. Ikkinchi bo‘limda o‘zgarishlar qildik va bu o‘yinimizni ancha yaxshi tomonga o‘zgartirdi.

- “Sho‘rtan” Kubok o‘yinlari orqali sinalmagan futbolchilarni sinab olishga harakat qiladimi?

- Shunaqa desak ham bo‘ladi. Chunki pro ligada baribir bahslar og‘ir kechyapti. Futbolchilarni boshqa joyda sinash bizga juda qiyin. Bizdan talab qilinayotgan narsa – bu har bir o‘yinda g‘alaba! Shuning uchun Kubok o‘yinlarida rotasiyalarga qo‘l uryapmiz. Ammo har bir o‘yin oddiy emas, kurashishga va g‘alaba qozonishga harakat qilamiz.

- Ikkinchi taym boshida hisob 1:1 bo‘lganidan so‘ng vaziyat boshqa tomonga o‘zgarib ketishi ham mumkin edi. Ammo yakunda 1:3 bo‘ldi. 1:1 dan keyin vaziyatni qo‘lga olishga nima halaqit berdi? Futbolchilarni jismoniy holati pand berdimi yoki “Andijon” juda tajribali ko‘rindimi?

- “Andijon” tajribaliroq. E’tibor qilgan bo‘lsangiz, bir qanotdan ikkinchisiga to‘pni tez o‘tkazishadi. Qanotlarda Turg‘unboyev, Ashortia...Ular ham o‘rtaga kirishadi, uzoqdan zarbalar berishadi. Bir qator o‘yinlarini ko‘rdik, uzoq masofalardan gollar urishdi. Biz ham shunga yarasha tayyorlandik. Ayrim futbolchilarimiz Superliga tempiga sekinlik qildi, deyish mumkin. Uchinchi golda zarba berishga imkoniyat berdik. 1:1 bo‘lib turganida jamoamiz a’zosi – Qodirov juda qulay vaziyatdan yaxshi zarba bera olmadi. O‘zingiz aytganingizdek o‘yin o‘zgarib ketishi ham mumkin edi.

- Guruhda “Andijon”ni ustun ko‘rasizmi yoki “Nasaf”nimi?

- Tarkib tomonlama “Andijon”da ustunlik. “Nasaf”ni kuchli tomoni jamoaviy o‘yin. “Nasaf” lider jamoalarga qarshi juda yaxshi o‘ynay oladi. Kubok bahsi ham qiziqarli o‘tadi. Tarkib tomonlama “Andijon”da xatto ayrim holatlarda terma jamoa futbolchilari ham zaxirada o‘tiradi", - dedi Aliqulov.