«Barselona» bosh murabbiyi Xans-Diter Flik jurnalistlarning vinger Rafinya Diasning kelajagi haqidagi savoliga javob berdi. Braziliyalik futbolchining yozgi transfer oynasi ochilishidan oldin Kataloniya klubini tark etishi kutilayotgan edi. Mish-mishlarga ko‘ra, Saudiya Arabistoni chempionati vakillari «Barselona» va futbolchining o‘ziga o‘ta foydali shartlar taklif qilishga tayyor.

«Rafinya biz uchun juda muhim, u aql bovar qilmas darajadagi o‘yin namoyish etmoqda. U uzoq vaqtdan beri shu yerda va menimcha, u jamoada qoladi. Rafinya — jamoaning eng muhim futbolchilaridan biri», — dedi Flik «Betis» ustidan qozonilgan g‘alabadan (3:1) keyingi matbuot anjumanida.

Rafinya La Liganing 37-turidan o‘rin olgan yakshanba kungi bahsda dubl qayd etib, uchrashuv qahramoniga aylandi. 29 yoshli futbolchining amaldagi shartnomasi 2028 yilgacha mo‘ljallangan.