«Барселона» бош мураббийи Ханс-Дитер Флик журналистларнинг вингер Рафинья Диаснинг келажаги ҳақидаги саволига жавоб берди. Бразилиялик футболчининг ёзги трансфер ойнаси очилишидан олдин Каталония клубини тарк этиши кутилаётган эди. Миш-мишларга кўра, Саудия Арабистони чемпионати вакиллари «Барселона» ва футболчининг ўзига ўта фойдали шартлар таклиф қилишга тайёр.
«Рафинья биз учун жуда муҳим, у ақл бовар қилмас даражадаги ўйин намойиш этмоқда. У узоқ вақтдан бери шу ерда ва менимча, у жамоада қолади. Рафинья — жамоанинг энг муҳим футболчиларидан бири», — деди Флик «Бетис» устидан қозонилган ғалабадан (3:1) кейинги матбуот анжуманида.
Рафинья Ла Лиганинг 37-туридан ўрин олган якшанба кунги баҳсда дубль қайд этиб, учрашув қаҳрамонига айланди. 29 ёшли футболчининг амалдаги шартномаси 2028 йилгача мўлжалланган.
