"Реал" бош мураббийи Жозе Моуриньо Дани Себальоснинг клубдан кетиши қандай ҳал бўлганини айтиб берди. Португалиялик мутахассис бу ҳақда "Бетис"га қарши эртанги Ла Лига ўйини олдидан Вальдебебасда ўтказилган матбуот анжуманида гапирди.
"Биз телефонда уч дақиқа гаплашдик. Мен унга режаларимда йўқлигини айтдим", — деди Моуриньо.
Унинг сўзларига кўра, Себальос шартномасига таяниб, клубда қолишга уриниб кўрмаган.
"Футболчилар кўп ҳолларда амалдаги шартномасига таяниб қолишни хоҳлайди. Аммо бу вазиятда у ҳолатни тўғри тушунди ва эркин агентга айланиб, келажагини ўзи белгилашни маъқул кўришини айтди", — дея таъкидлади мураббий.
Шундан сўнг "Реал" ва футболчи ўртасида шартномани бекор қилиш бўйича келишувга эришилган.
"Биз келишувга келдик, шартномани бекор қилдик ва Себальос ўз келажаги бўйича эркин қарор қабул қилиш ҳуқуқига эга бўлди", — деди Моуриньо.
Себальос кейинчалик ўзи тарбия топган "Бетис"га қайтди.
