Рожер Мартинес «Барса Атлетик»ни тарк этиб, Қатар иккинчи дивизионида иштирок этувчи «Ал-Мархия» клубига ўтди.

Трансфер келишувига футболчининг кейинги сотувидан «Барселона»га маълум фоиз тўланишини назарда тутувчи банд ҳам киритилган. Шу билан 22 ёшли футболчининг каталонияликлар клубидаги иккинчи даври якунланди.

Ўтган мавсумда Мартинеснинг ривожланишига жиддий жароҳат халақит берди. У ўнг тиззасининг ташқи менискини жиддий шикастлаб олган эди.

Шунга қарамай, клуб раҳбарияти унинг тикланиш жараёнидаги муносабати ва профессионал ёндашувидан мамнун бўлган.

Мартинес мунтазам ўйин амалиётига эга бўлиш, молиявий жиҳатдан манфаатли шартларга эришиш ва аввалги формасини тиклаш имконияти сабаб Қатар клуби таклифини қабул қилди.