«Ayaks» navbatdagi o‘yinlarini «Volendam» klubi stadionida o‘tkazadi. «Yoxan Kroyff Arena»da ingliz xonandasi Xarri Staylsning konsertlari rejalashtirilgani sababli, amsterdamliklar o‘z o‘yinlari uchun boshqa joy izlashlariga to‘g‘ri keldi.

Niderlandiya chempionatini beshinchi o‘rinda yakunlagan Oskar Garsiya jamoasi Konferensiyalar ligasi yo‘llanmasi uchun pley-off bosqichida ishtirok etadi. Yarim finalda ularga «Groningen» raqiblik qiladi. Agar «Ayaks» finalga chiqadigan bo‘lsa, hal qiluvchi bahs ham Volendamda bo‘lib o‘tadi. Bu o‘yin mezbonlar («Volendam») va «Villem II» o‘rtasidagi ligada jon saqlab qolish uchun kechadigan pley-off finalidan atigi bir kun keyin o‘tkaziladi.

Shunday qilib, «Kras» stadioni 4 kun ichida 3 ta rasmiy uchrashuvni qabul qilishi mumkin. «Volendam» bosh direktori arena bunday yuklamaga tayyor ekanligini allaqachon tasdiqladi.