Ispaniya terma jamoasi bosh murabbiyi Luis de la Fuente «Real» klubida yetarli o‘yin amaliyotiga ega bo‘lmayotgan himoyachi Daniel Karvaxal haqidagi fikrlari bilan o‘rtoqlashdi.
Avvalroq, 34 yoshli futbolchi terma jamoaning JCH-2026 uchun qaydnomasiga kiritilmasligi haqida ma’lumotlar paydo bo‘lgan edi.
«Dani — ajoyib sardor. U barchamiz uchun namunadir. Hozir u faoliyatidagi qiyin davrni boshdan kechirmoqda.
Men u ko‘proq o‘yin amaliyotiga ega bo‘lishini, maydonga tushib, o‘zining futbolchilik qobiliyati va salohiyatini namoyish etishini xohlardim.
Futbolchilarning jahon chempionatiga borishi yoki bormasligi haqida men hamisha adolatli qaror qabul qilaman.
Umid qilamanki, Dani yana o‘ynay boshlaydi, biroq ayni damda u jahon chempionatida maydonga tushishga tayyor emas. U yana futboldan zavq ola boshlashiga ishonaman. Insoniylik — hamma narsadan ustun», — dedi Luis de la Fuente.
