Belgiyaning "Bryugge" klubi o‘z tarixida 20-marotaba mamlakat chempionligini qo‘lga kiritdi. Jamoa mavsum tugashiga bir tur qolganidayoq oltin medallarni rasman ta’minladi.

Ivan Leko shogirdlari hal qiluvchi uchrashuvda "Mexelen" bilan 2:2 hisobida durang o‘ynadi. Shu natijadan keyin “Bryugge”ning eng yaqin ta’qibchisi Yunion bilan farqi 4 ochkoga yetdi va bu ustunlikni qolgan bir turda yo‘qotish imkoni qolmadi.

Shu tariqa “Bryugge” 2025/26 yilgi mavsum yakuniga ko‘ra Belgiyaning eng kuchli klubi sifatida tan olindi.

Belgiya chempionati reglamentiga ko‘ra, har 10 ta chempionlik uchun klub emblemasi ustiga bitta yulduz qo‘shiladi. Endi “Bryugge” logotipi ustida ikki yulduz joylashadi.

Bundan tashqari, klub 2026/27 yilgi Yevropa Chempionlar ligasining asosiy bosqichida ishtirok etish huquqini ham qo‘lga kiritdi.

Ma’lumot uchun, Belgiya chempionatida eng ko‘p g‘oliblik "Anderlext" hisobiga to‘g‘ri keladi — bryusselliklar 34 marta chempion bo‘lgan. Joriy mavsumda esa jamoa to‘rtinchi o‘rinni egalladi.