«Barselona» va «Arsenal»ning sobiq yarim himoyachisi Aleksandr Gleb «kanonirlar»ning joriy mavsumdagi Angliya Premyer-ligasidagi zafarini yuqori baholadi.
Fonbet yutub-kanaliga bergan intervyusida Gleb London klubining yillar davomida to‘plagan tajribasi o‘z mevasini berganini ta’kidladi:
«So‘nggi 2-3 mavsum davomida «Arsenal» juda chiroyli va yuqori saviyali futbol namoyish etdi. Ularga doimo ozgina yetishmayotgan edi. Bu mavsumda esa «Arsenal» chempionlikka haqiqatdan ham haqli edi», — deya fikr bildirdi sobiq futbolchi.
Eslatib o‘tamiz, Mikel Arteta shogirdlari Angliya chempionati yakuniga bir tur qolganidayoq oltin medallarini naqd qilib qo‘yishdi. «Arsenal» endi e’tiborini mavsumdagi yana bir nufuzli sovrin — Chempionlar ligasi finaliga qaratmoqda. 30 may kuni londonliklar bosh sovrin uchun Fransiyaning «PSJ» klubiga qarshi maydonga chiqishadi.
