«Барселона» ва «Арсенал»нинг собиқ ярим ҳимоячиси Александр Глеб «канонирлар»нинг жорий мавсумдаги Англия Премьер-лигасидаги зафарини юқори баҳолади.
Fonbet ютуб-каналига берган интервьюсида Глеб Лондон клубининг йиллар давомида тўплаган тажрибаси ўз мевасини берганини таъкидлади:
«Сўнгги 2-3 мавсум давомида «Арсенал» жуда чиройли ва юқори савияли футбол намойиш этди. Уларга доимо озгина етишмаётган эди. Бу мавсумда эса «Арсенал» чемпионликка ҳақиқатдан ҳам ҳақли эди», — дея фикр билдирди собиқ футболчи.
Эслатиб ўтамиз, Микель Артета шогирдлари Англия чемпионати якунига бир тур қолганидаёқ олтин медалларини нақд қилиб қўйишди. «Арсенал» энди эътиборини мавсумдаги яна бир нуфузли соврин — Чемпионлар лигаси финалига қаратмоқда. 30 май куни лондонликлар бош соврин учун Франциянинг «ПСЖ» клубига қарши майдонга чиқишади.
