«Manchester Yunayted» yarim himoyachisi Brunu Fernandesh APLning bir mavsumida eng ko‘p golli uzatma amalga oshirish bo‘yicha yangi rekord o‘rnatgani (21 ta) haqida fikr bildirdi.

«Bu juda ajoyib. Men bundan juda xursandman. Bu juda muhim lahza. Ochig‘ini aytsam, bu marraga yaqinlashmagunimcha, bu haqda o‘ylamagan edim. Bugun bu natijaga erishish menga nasib qildi.

Murabbiy Jonni Evans biz Patrik uchun tayyorlagan standart holatdan foydalanishga mendan ko‘ra ko‘proq ishondi, chunki men uning boshi bilan gol ura olishiga unchalik ishonmagan edim. Men golli uzatmani amalga oshirdim, ammo eng muhimi — bugun g‘alaba qozondik va mavsumni juda kuchli tarzda yakunladik», — deya 31 yoshli futbolchining so‘zlarini keltiradi Sky Sports.

Fernandesh Angliya chempionatining 38-turi doirasida «Brayton»ga qarshi safarda o‘tkazilgan o‘yinda (3:0) Patrik Dorguning goliga assistentlik qildi.

2025/26 yilgi mavsumda yarim himoyachi barcha turnirlarda 37 ta uchrashuvda maydonga tushib, to‘qqizta gol urdi va 22 ta golli uzatmani o‘z hisobiga yozdirib qo‘ydi.