Taniqli transfer insayderi Fabrisio Romano «Atletiko Madrid» va hujumchi Xulian Alvares o‘rtasidagi muzokaralar haqida yangi ma’lumotlarni oshkor qildi.

Manbaga ko‘ra, «matraschilar» argentinalik futbolchiga bir qator manfaatli shartlarni taklif qilgan, biroq 26 yoshli hujumchi shartnomani uzaytirishdan qat’iyan bosh tortmoqda. Romanoning ta’kidlashicha, Alvaresning ketish ehtimoli kun sayin oshib bormoqda. «Yaqin vaqt ichida uning kelajagi borasida yangi xabarlar paydo bo‘ladi», — deya qo‘shimcha qildi ekspert.

Avvalroq turli nashrlar Xulian Alvares «PSJ» va «Arsenal»dan bo‘lgan takliflarga qaramay, aynan «Barselona» safiga o‘tishni maqsad qilganini xabar qilgandi.

Ma’lumot uchun, Transfermarkt portali futbolchini 90 million yevroga baholamoqda. Alvaresning «Atletiko» bilan amaldagi shartnomasi 2030 yilga qadar mo‘ljallangan.