Таниқли трансфер инсайдери Фабрицио Романо «Атлетико Мадрид» ва ҳужумчи Хулиан Альварес ўртасидаги музокаралар ҳақида янги маълумотларни ошкор қилди.

Манбага кўра, «матрасчилар» аргентиналик футболчига бир қатор манфаатли шартларни таклиф қилган, бироқ 26 ёшли ҳужумчи шартномани узайтиришдан қатъиян бош тортмоқда. Романонинг таъкидлашича, Альвареснинг кетиш эҳтимоли кун сайин ошиб бормоқда. «Яқин вақт ичида унинг келажаги борасида янги хабарлар пайдо бўлади», — дея қўшимча қилди эксперт.

Аввалроқ турли нашрлар Хулиан Альварес «ПСЖ» ва «Арсенал»дан бўлган таклифларга қарамай, айнан «Барселона» сафига ўтишни мақсад қилганини хабар қилганди.

Маълумот учун, Transfermarkt портали футболчини 90 миллион еврога баҳоламоқда. Альвареснинг «Атлетико» билан амалдаги шартномаси 2030 йилга қадар мўлжалланган.