«Vest Xem» klubi Nunu Eshpiritu Santu bosh murabbiy lavozimida qolishini rasman e’lon qildi.

«Hafta boshida bosh murabbiy bilan uchrashuv o‘tkazdik va u klubga sodiq ekanini tasdiqladi. Nunu «Vest Xem»ni birinchi urinishdayoq yuqori ligaga qaytarishga ishonadi. Bu kelasi mavsum uchun asosiy maqsadimiz bo‘ladi. Eslatib o‘tamiz, Nunu 2018 yilda «Vulverxempton» bilan Chempionshipda 99 ochko to‘plab, chempionlikni qo‘lga kiritgan edi.

Yakshanba kungi natija og‘riqli bo‘lsa-da, direktorlar kengashi so‘nggi oylarda jamoa o‘yinida ijobiy o‘zgarishlarni ko‘rdi va Nunu bu progressni davom ettirishini istaydi», — deyiladi London klubi bayonotida.

2025/26 yilgi mavsum yakunlariga ko‘ra, «Vest Xem» 39 ochko bilan APLda 18-o‘rinni egallab, Chempionshipga ravona bo‘ldi. Portugaliyalik mutaxassis jamoani o‘tgan yilning sentyabr oyidan beri boshqarib kelmoqda.