«Вест Хэм» клуби Нуну Эшпириту Санту бош мураббий лавозимида қолишини расман эълон қилди.
«Ҳафта бошида бош мураббий билан учрашув ўтказдик ва у клубга содиқ эканини тасдиқлади. Нуну «Вест Хэм»ни биринчи уринишдаёқ юқори лигага қайтаришга ишонади. Бу келаси мавсум учун асосий мақсадимиз бўлади. Эслатиб ўтамиз, Нуну 2018 йилда «Вулверхэмптон» билан Чемпионшипда 99 очко тўплаб, чемпионликни қўлга киритган эди.
Якшанба кунги натижа оғриқли бўлса-да, директорлар кенгаши сўнгги ойларда жамоа ўйинида ижобий ўзгаришларни кўрди ва Нуну бу прогрессни давом эттиришини истайди», — дейилади Лондон клуби баёнотида.
2025/26 йилги мавсум якунларига кўра, «Вест Хэм» 39 очко билан АПЛда 18-ўринни эгаллаб, Чемпионшипга равона бўлди. Португалиялик мутахассис жамоани ўтган йилнинг сентябрь ойидан бери бошқариб келмоқда.
