2027 yilgi 20 yoshgacha bo‘lgan futbolchilar o‘rtasidagi (U20) Osiyo Kubogining saralash bosqichiga rasman qur’a tashlandi. Unga ko‘ra, O‘zbekiston yoshlar terma jamoasining bo‘lajak raqiblari nomi aniq bo‘ldi.
Qur’a natijalariga ko‘ra, yurtimiz vakillari musobaqaning «B» guruhidan joy olishdi. Jamoliddin Rahmatullayev qo‘l ostidagi o‘zbekistonlik futbolchilar qit’a birinchiligining yo‘llanmasi uchun Suriya, Hindiston hamda Bangladesh terma jamoalariga qarshi yashil maydonga tushishadi.
Muhim jihati shundaki, mazkur guruhdagi barcha saralash uchrashuvlariga O‘zbekiston mezbonlik qiladi. Bahslar shu yilning 25 avgustidan 6 sentyabriga qadar Toshkent shahrida bo‘lib o‘tishi belgilangan.
