Ispaniya terma jamoasi hamda “Barselona” klubi yarim himoyachisi Gavi navbatdagi jahon chempionati, undagi asosiy da’vogarlar va shaxsiy mukofotlar borasidagi o‘z taxminlari bilan o‘rtoqlashdi.

Ispaniyalik iqtidor egasining fikricha, bo‘lajak turnirda bosh sovrinni aynan Ispaniya qo‘lga kiritadi. Ikkinchi o‘rin masalasida esa yarim himoyachi Portugaliya terma jamoasining imkoniyatlarini yuqori baholagan. Shuningdek, Gavi Ekvador termasini musobaqaning bosh kashfiyoti bo‘lishini taxmin qildi.

Mundialning eng yaxshi to‘purari kim bo‘lishi haqidagi savolga futbolchi quyidagicha javob bergan:

“Ushbu sovringa o‘z jamoadoshlarimdan biri ega chiqishini juda ham xohlar edim. Bu borada Mikel Oyyarsabalning imkoniyatlarini yuqoriroq baholagan bo‘lardim”, — deydi Gavi.

Yarim himoyachi, shuningdek, Portugaliya terma jamoasi a’zosi Joau Feliks musobaqada barchani hayron qoldirishi mumkinligini ta’kidlagan. Futbol olamining eng nufuzli shaxsiy sovrini — “Oltin to‘p” borasida to‘xtalar ekan, Gavi ushbu mukofotni jamoadoshi Lamin Yamal qo‘lga kiritishidan umidvorligini bildirdi.

Suhbat yakunida yosh yulduz o‘zining ushbu sovringa loyiqligi borasidagi savolga kamtarlik bilan javob qaytardi. Uning fikricha, bunday yuqori cho‘qqilarni zabt etish uchun unda hali vaqt yetarli va buning uchun ko‘proq mehnat qilishi lozim.