Esekiel Lavessi "PSJ" jamoasining Yevropa Chempionlar Ligasida ko‘rsatayotgan mazmunli o‘yinlari va erishayotgan yutuqlaridan g‘ururlanishini yashirib o‘tirmadi.

Argentinalik sobiq yulduzning ta’kidlashicha, klubning bugungi darajaga chiqishi ortida katta mehnat yotibdi.

“Bu menga cheksiz quvonch bag‘ishlamoqda. "PSJ"ning yana bir bor Yevropa futboli cho‘qqisiga yaqin kelgani va finalda “Arsenal”dek kuchli raqib bilan to‘qnash kelishi ko‘p yillik tizimli mehnatlar behuda ketmaganini anglatadi. Bundan shaxsan o‘zim ham faxrlanaman, chunki ushbu katta loyihaning boshlanishida bizning ham oz bo‘lsa-da hissamiz bor deb o‘ylayman. YECHL — juda murakkab turnir, biroq Parij klubining ushbu saviyada muqim qolayotgani ular allaqachon qit’aning eng yetakchi grandlari qatoridan joy olganini isbotlaydi”, — deydi Lavessi.

Shuningdek, sobiq futbolchi bugun oqshom “Arsenal”ga qarshi bo‘lib o‘tadigan hal qiluvchi final uchrashuvi haqida to‘xtalar ekan, bahs taqdirini nimalar hal qilishi mumkinligini taxmin qildi.

Uning fikricha, bunday darajadagi o‘yinlarda taktika juda muhim bo‘lsa-da, ko‘pincha kichik detallar va futbolchilarning shaxsiy mahorati ustunlikni ta’minlaydi. Bundan tashqari, bosimga bardosh berish va hissiyotlarni jilovlay olish eng asosiy omillardan biridir. Lavessi Parij klubi a’zolari maydonga sovuqqonlik va katta ishtiyoq bilan tushishiga hamda kerakli soniyalarda raqibga zarba bera olishiga ishonch bildirdi.