Polshaning Varshava shahrida Mehribonlik uylari tarbiyalanuvchilari o‘rtasida futbol bo‘yicha XI jahon chempionati bo‘lib o‘tdi. Unda O‘zbekiston vakillari musobaqa g‘olibligini qo‘lga kiritdi. Bu haqda Ijtimoiy himoya milliy agentligi matbuot xizmati xabar berdi.
Turnirda dunyoning turli davlatlaridan jami 35 ta jamoa ishtirok etdi. Ushbu turnirda O‘zbekiston nomidan Toshkent shahridagi 22-sonli Mehribonlik uyi tarbiyalanuvchilaridan iborat jamoa qatnashdi.
Musobaqa doirasida o‘tkazilgan 7 ta uchrashuvning barchasida O‘zbekiston jamoasi g‘alaba qozonib, final bosqichiga yo‘llanma oldi. Hal qiluvchi final bahsida ham muvaffaqiyatga erishgan o‘zbekistonliklar turnirning mutlaq g‘olibiga aylandi.













