«Milan» rahbariyati avstriyalik murabbiy Oliver Glasner bilan qachon muzokara o‘tkazishi ma’lum bo‘ldi. Insayder Nikolo Skiraning xabariga ko‘ra, tomonlar o‘rtasidagi uchrashuv bugun, 2 iyun kuni bo‘lib o‘tadi. Glasner «Milan»ning bosh murabbiylik lavozimi uchun asosiy nomzodlaridan biri ekani ta’kidlanmoqda.
«Milan» o‘tgan mavsumda Italiya A Seriyasini 38 turda 70 ochko to‘plagan holda beshinchi o‘rinda yakunladi.
Eslatib o‘tamiz, 51 yoshli Glasner 2024 yildan buyon faoliyat yuritgan «Kristal Pelas»ni tark etishini e’lon qilgandi. Uning boshqaruvida «burgutlar» Angliya Kubogi va Superkubogi, shuningdek, UEFA Konferensiyalar ligasida g‘olib chiqishdi. Ta’kidlash joizki, bungacha «Kristal Pelas» tarixida biror marta ham katta sovrin yutmagan edi.
