Madridning «Real» klubi sobiq futbolchisi va murabbiyi Xorxe Valdano «qaymoqranglilar»ning yulduz hujumchisi Kilian Mbappening o‘yini haqida o‘z fikrlari bilan o‘rtoqlashdi.

«Kilian Fransiyada ham, Ispaniyada ham eng yaxshi to‘purarga aylangan. O‘tgan yili u butun Yevropaning eng yaxshi goleadori bo‘ldi. U o‘zidan kutilayotgan ishlarni bajaryapti. Jamoaning eng yaxshi futbolchisini «Real»ning omadsizliklarida ayblash mumkin emas. Bu ahmoqona ko‘rinadi», — deya ekspertning so‘zlarini keltiradi AS nashri.

Ispaniya La Ligasining yakunlangan mavsumida 27 yoshli fransiyalik hujumchi 31 ta uchrashuvda maydonga tushib, 25 ta gol urdi va 5 ta golli uzatmani amalga oshirdi. Mbappening transfer qiymati Transfermarkt portali tomonidan 180 million yevroga baholanmoqda. Uning «qirollik klubi» bilan shartnomasi 2029 yilning iyun oyi oxirida yakuniga yetadi.