Мадриднинг «Реал» клуби собиқ футболчиси ва мураббийи Хорхе Вальдано «қаймоқранглилар»нинг юлдуз ҳужумчиси Килиан Мбаппенинг ўйини ҳақида ўз фикрлари билан ўртоқлашди.

«Килиан Францияда ҳам, Испанияда ҳам энг яхши тўпурарга айланган. Ўтган йили у бутун Европанинг энг яхши голеадори бўлди. У ўзидан кутилаётган ишларни бажаряпти. Жамоанинг энг яхши футболчисини «Реал»нинг омадсизликларида айблаш мумкин эмас. Бу аҳмоқона кўринади», — дея экспертнинг сўзларини келтиради AS нашри.

Испания Ла Лигасининг якунланган мавсумида 27 ёшли франциялик ҳужумчи 31 та учрашувда майдонга тушиб, 25 та гол урди ва 5 та голли узатмани амалга оширди. Мбаппенинг трансфер қиймати Transfermarkt портали томонидан 180 миллион еврога баҳоланмоқда. Унинг «қироллик клуби» билан шартномаси 2029 йилнинг июнь ойи охирида якунига етади.