Milanning «Inter» klubi hujumchisi Lautaro Martines bo‘lajak jahon chempionati haqidagi fikrlari bilan o‘rtoqlashdi. Bugun argentinaliklar o‘rtoqlik uchrashuvida Gondurasni 2:0 hisobida mag‘lub etishdi. «Neradzurrilar» sardori har ikkala golda ishtirok etdi: 37-daqiqada penaltini aniq amalga oshirgan bo‘lsa, 54-daqiqada Juliano Simeonega golli uzatma yetkazib berdi.

«Men jahon chempionatiga yaxshi tayyorgarlik ko‘rdim — birinchi navbatda ruhiy jihatdan. Qatardagi o‘tgan mundialda eng yaxshi holatimda emasdim, hozir esa o‘zimni juda yaxshi his qilyapman. Biz jahon chempionligi unvonini himoya qilishimiz kerak. Qiyin bo‘ladi, lekin biz bor kuchimizni ishga solamiz va Argentinaga yana muvaffaqiyat keltirishga harakat qilamiz. Umid qilamanki, biz belgilangan yo‘nalishda davom etamiz», — deya Lautaroning so‘zlarini keltiradi AlbicelesteTalk.

10 iyun kuni argentinaliklar Islandiyaga qarshi o‘rtoqlik uchrashuvi o‘tkazishadi, bir haftadan so‘ng esa Jazoirga qarshi bahs bilan JCH-2026 dagi yurishlarini boshlashadi.