Миланнинг «Интер» клуби ҳужумчиси Лаутаро Мартинес бўлажак жаҳон чемпионати ҳақидаги фикрлари билан ўртоқлашди. Бугун аргентиналиклар ўртоқлик учрашувида Гондурасни 2:0 ҳисобида мағлуб этишди. «Нерадзуррилар» сардори ҳар иккала голда иштирок этди: 37-дақиқада пенальтини аниқ амалга оширган бўлса, 54-дақиқада Жулиано Симеонега голли узатма етказиб берди.
«Мен жаҳон чемпионатига яхши тайёргарлик кўрдим — биринчи навбатда руҳий жиҳатдан. Қатардаги ўтган мундиалда энг яхши ҳолатимда эмасдим, ҳозир эса ўзимни жуда яхши ҳис қиляпман. Биз жаҳон чемпионлиги унвонини ҳимоя қилишимиз керак. Қийин бўлади, лекин биз бор кучимизни ишга соламиз ва Аргентинага яна муваффақият келтиришга ҳаракат қиламиз. Умид қиламанки, биз белгиланган йўналишда давом этамиз», — дея Лаутаронинг сўзларини келтиради AlbicelesteTalk.
10 июнь куни аргентиналиклар Исландияга қарши ўртоқлик учрашуви ўтказишади, бир ҳафтадан сўнг эса Жазоирга қарши баҳс билан ЖЧ-2026 даги юришларини бошлашади.
