Kolumbiya terma jamoasi Amerikaning San-Diyego shahrida bo‘lib o‘tgan o‘rtoqlik uchrashuvida Iordaniya ustidan g‘alaba qozondi — 2:0.
O‘yindagi hisob 41-daqiqada hujumchi Jon Arias tomonidan ochildi, unga yarim himoyachi Xames Rodriges golli uzatma yetkazib berdi. Bahsning 55-daqiqasida Arias dublni rasmiylashtirdi — bu safar unga himoyachi Santyago Arias assistentlik qildi.
Uchrashuvning 90-daqiqasida Iordaniya terma jamoasi yarim himoyachisi Amer Xamous ikkinchi sariq kartochkasini olib, maydondan chetlatildi.
Eslatib o‘tamiz, 2026 yilgi Jahon chempionati final bosqichining guruh bosqichida Kolumbiya terma jamoasi Portugaliya, Kongo DR va O‘zbekiston bilan birgalikda bahs olib boradi. Iordaniya esa Argentina, Jazoir hamda Avstriya terma jamoalariga qarshi maydonga tushadi.
