«Nyukasl» o‘ng qanot himoyachisi Tino Livramentoni qo‘yib yuborishga shoshilmayapti. 23 yoshli futbolchini o‘z safiga qo‘shib olishga hamon «Arsenal» va «Manchester Siti» klublari jiddiy qiziqish bildirmoqda. Biroq, TEAMtalk nashrining xabar berishicha, har ikki grand ham kamida 58 million funt sterlinglik (67 million yevrodan ortiq) moliyaviy talabni qondirishga tayyor emas.
«Kanonirlar» va «shaharliklar» Angliya terma jamoasi himoyachisining iqtidorini yuqori baholashmoqda, ammo undagi jarohatlarga moyillik klublar o‘rtasida xavotir uyg‘otmoqda. Shu sababli, har ikki tomon ham ayni paytda boshqa nomzodlar variantiga yuzlanishgan.
Yakunlangan mavsumda Tino Livramento «Nyukasl» safida 26 ta uchrashuvda maydonga tushib, 1 ta golli uzatmani amalga oshirdi. «Chelsi» akademiyasi tarbiyalanuvchisi hisoblangan futbolchining Transfermarkt portalidagi transfer bahosi 45 million yevroni tashkil etadi.
