«Tottenxem» safida markaziy himoyachi pozisiyasida to‘p tepuvchi Ben Devis londonliklar bilan yangi shartnoma imzoladi. Uels terma jamoasi a’zosi «shporlar» sharafini 2026/2027 yilgi mavsum yakuniga qadar himoya qiladigan bo‘ldi. Bu haqda klub rasmiy sayti xabar bermoqda.

«Ben — kiyinish xonasida o‘z ta’siriga ega bo‘lgan futbolchi. U bir necha bor klub sardori sifatida maydonga tushgan va o‘zining har bir harakati bilan «Tottenxem» qadriyatlarini aks ettirishda davom etmoqda. Tabriklaymiz, Ben!» — deyiladi klub matbuot xizmati xabarida.

Devis «Tottenxem» safida 12 yildan buyon o‘ynab kelmoqda — himoyachi 2014 yilda «Suonsi» klubidan London jamoasiga ko‘chib o‘tgan edi. 33 yoshli futbolchi «shporlar» libosida jami 363 ta uchrashuvda maydonga tushib, o‘z hisobiga 10 ta gol va 26 ta golli uzatmani yozdirib qo‘ygan.