Turinning «Yuventus» klubi Londonning «Arsenal» klubi tomonidan turkiyalik yarim himoyachi Kenan Yildizga bo‘layotgan qiziqishga munosabat bildirdi.
The Athletic jurnalistlarining xabar berishicha, «keksa sinyora» rahbariyati «kanonirlar»ga 21 yoshli vinger sotilmasligini uqtirgan. Shu sababli, Angliyaning top-klubi e’tiborini boshqa variantlarga qaratishga qaror qildi.
Italiya A Seriyasining yakunlangan mavsumida Kenan 36 ta uchrashuvda maydonga tushib, o‘z hisobiga o‘nta gol va oltita golli uzatmani yozib qo‘ygan edi.
Yildiz va «Yuventus» o‘rtasidagi amaldagi mehnat shartnomasi 2030 yilning iyun oyi yakuniga qadar mo‘ljallangan. Futbolchining bozor qiymati 75 million yevroga baholanmoqda.
