«Liverpul» klubi «Osasuna» a’zosi Viktor Munyos bilan shartnoma imzolashga juda yaqin turibdi, deb xabar bermoqda insayder Fabrisio Romano.

Mersisaydliklar futbolchini bungacha transfer borasida ancha ilgarilab ketgan «Nyukasl»dan ilib ketishdi. «Liverpul» jarayonga so‘nggi pallada aralashib, Munyos bilan 2032 yilning yoziga qadar mo‘ljallangan shartnoma shartlarini og‘zaki ravishda kelishib oldi.

«Qizillar» ispaniyalik futbolchining shartnomasida ko‘rsatilgan 40 million yevrolik tovon pulini (vikup) faollashtirishadi. 22 yoshli Munyosga bo‘lgan huquqlarning yarmi «Real Madrid»ga tegishli, bu esa «Qirollik klubi» o‘z tarbiyalanuvchisi uchun 20 million yevro qabul qilib olishini anglatadi.

Ortda qolgan La Liga mavsumida Munyos «Osasuna» safida 34 ta o‘yinda maydonga tushib, o‘z hisobiga 7 ta gol va 2 ta golli uzatma yozdirib qo‘ygan edi.