«Ливерпуль» клуби «Осасуна» аъзоси Виктор Муньос билан шартнома имзолашга жуда яқин турибди, деб хабар бермоқда инсайдер Фабрицио Романо.

Мерсисайдликлар футболчини бунгача трансфер борасида анча илгарилаб кетган «Ньюкасл»дан илиб кетишди. «Ливерпуль» жараёнга сўнгги паллада аралашиб, Муньос билан 2032 йилнинг ёзига қадар мўлжалланган шартнома шартларини оғзаки равишда келишиб олди.

«Қизиллар» испаниялик футболчининг шартномасида кўрсатилган 40 миллион евролик товон пулини (выкуп) фаоллаштиришади. 22 ёшли Муньосга бўлган ҳуқуқларнинг ярми «Реал Мадрид»га тегишли, бу эса «Қироллик клуби» ўз тарбияланувчиси учун 20 миллион евро қабул қилиб олишини англатади.

Ортда қолган Ла Лига мавсумида Муньос «Осасуна» сафида 34 та ўйинда майдонга тушиб, ўз ҳисобига 7 та гол ва 2 та голли узатма ёздириб қўйган эди.