UYEFA «Roma» va «Marsel» klublarini jarimaga tortdi.
Klublarni moliyaviy nazorat qilish organi mazkur jamoalar tomonidan moliyaviy feyr-pley qoidalarini buzish bilan bog‘liq ravishda tuzilgan kelishuv shartlari qanday bajarilayotganini baholab chiqdi.
Fransiya klubi 2025/26 yilgi mavsumda talab etilgan daromad darajasiga erisha olmadi, shu sababli unga nisbatan quyidagi sanksiyalar qo‘llanildi:
-
Agar klub 2026/27 yilgi mavsumda futbol faoliyatidan olinadigan daromadlar bo‘yicha belgilangan maqsadli ko‘rsatkichlarga erisha olmasa, yaqin uch mavsum ichida yo‘llanma qo‘lga kiritadigan ilk yevrokubok turniridan chetlashtiriladi;
-
Klubning 2026/27 yilgi mavsumdagi yevrokubok musobaqalari uchun yangi futbolchilarni ro‘yxatdan o‘tkazish (qaydnomaga kiritish) imkoniyati cheklanadi;
-
6 million yevro miqdorida jarima undiriladi.
Bundan tashqari, jamoa tarkibini saqlab turish xarajatlari umumiy daromadning 70 foizidan oshib ketgani sababli, UYEFA «Marsel» klubini yana qo‘shimcha 4 million yevro jarimaga tortdi.
«Roma» klubi ham oraliq maqsadli ko‘rsatkichga erisha olmadi va 2 million yevro miqdorida jarimaga tortildi. Bundan tashqari, yuqorida tilga olingan 70 foizlik cheklovdan o‘tib ketgani uchun rimliklarga yana 4 million yevro qo‘shimcha jarima solindi.
«Milan», «Monako», «Beshiktosh», «Inter», «PSJ», «Antverpen» va «Trabzonspor» klublari esa kelishuv talablarini to‘liq bajarishdi va shu sababli ulardan cheklovlar olib tashlandi.
