Braziliya terma jamoasi ustozi Jahon chempionati-2026 guruh bosqichi 2-turidan o‘rin olgan Gaitiga qarshi bahsda (3:0) Sankt-Peterburgning «Zenit» klubi himoyachisi Duglas Santos ko‘rsatgan o‘yinni yuqori baholadi.
«Vinisiusni markazroqqa ko‘chirish, qanotni esa Santosga topshirish bo‘yicha qaror qabul qilgandik. Duglas ajoyib uchrashuv o‘tkazdi. Vini esa nafaqat yakkama-yakka vaziyatlarda, balki markazdan uyushtirilgan hujumlarda ham xavf sola oldi», — dedi italiyalik mutaxassis o‘yindan keyingi matbuot anjumanida.
Eslatib o‘tamiz, Braziliya terma jamoasi Gaiti ustidan 3:0 hisobida ishonchli g‘alabaga erishdi.
Guruh bosqichining so‘nggi hal qiluvchi uchrashuvida Anchelotti shogirdlari Shotlandiya terma jamoasiga qarshi maydonga tushadi.
