Braziliya terma jamoasi vingeri Vinisius Junior Jahon chempionati–2026 doirasida Gaitiga qarshi kechgan o‘yinda (3:0) raqib darvozasini ishg‘ol etdi va Mateus Kunyaga golli uzatma yetkazib berdi.
Musobaqaning 1-turida «Real» futbolchisi Marokash (1:1) darvozasiga ham yo‘l topgan edi. Shu tariqa, joriy Jahon chempionatida Vinisiusning «gol+pas» tizimi bo‘yicha jamg‘argan ochkolari 3 taga (2 ta gol va 1 ta assist) yetdi.
Braziliyalik yulduz ushbu ko‘rsatkich bo‘yicha musobaqa to‘purarlari ro‘yxatida yetakchilikni qo‘lga oldi. Ayni paytda u bilan bir qatorda Argentinadan Lionel Messi (Jazoir bilan o‘yinda 3 ta gol), Kanadadan Jonatan Devid (ikkita o‘yinda 3 ta gol), Germaniyadan Deniz Undav (1+2) va Shvesiyadan Aleksander Isak (1+2) ham 3 ochko bilan yetakchilik qilishmoqda.
