Ispaniya terma jamoasi darvozaboni Unay Simon milliy jamoa safida jahon chempionatlaridagi «quruq» o‘yinlar soni bo‘yicha afsonaviy golkiper Andoni Subisarretani ortda qoldirdi.

Bu natija jahon birinchiligi guruh bosqichi 3-turidan o‘rin olgan Urugvayga qarshi uchrashuvdan (1:0) so‘ng qayd etildi. Ushbu bahs Simon uchun JCHlarda o‘tkazilgan 8 ta o‘yindagi beshinchi «quruq» o‘yin bo‘ldi. Subisarreta esa terma jamoalarning eng nufuzli musobaqasidagi 16 ta o‘yindan 4 tasida gol o‘tkazib yubormagan. Shu bilan birga, Andoni to‘rtta JCHda ishtirok etgan bo‘lsa, Unay uchun joriy mundial faoliyatidagi bor-yo‘g‘i ikkinchisidir.

Jahon chempionatlarida bundan ko‘p «quruq» uchrashuv faqat Iker Kasilyasga tegishli (7 ta) — u ham xuddi Subisarreta kabi to‘rtta JCHda qatnashgan. Iker ushbu turnirda jami 17 ta o‘yin o‘tkazgan.

Simon Ispaniya terma jamoasi safida jami 61 ta o‘yinda maydonga tushgan. Bu vaqt ichida u 48 ta gol o‘tkazib yuborib, 27 bor darvozasi daxlsizligini saqlab qolgan. Oldinda Ispaniyani JCH 1/16 finali doirasida Avstriyaga qarshi o‘yin kutmoqda, uchrashuv 2 iyul kuni bo‘lib o‘tadi.