Испания терма жамоаси дарвозабони Унай Симон миллий жамоа сафида жаҳон чемпионатларидаги «қуруқ» ўйинлар сони бўйича афсонавий голкипер Андони Субисарретани ортда қолдирди.

Бу натижа жаҳон биринчилиги гуруҳ босқичи 3-туридан ўрин олган Уругвайга қарши учрашувдан (1:0) сўнг қайд этилди. Ушбу баҳс Симон учун ЖЧларда ўтказилган 8 та ўйиндаги бешинчи «қуруқ» ўйин бўлди. Субисаррета эса терма жамоаларнинг энг нуфузли мусобақасидаги 16 та ўйиндан 4 тасида гол ўтказиб юбормаган. Шу билан бирга, Андони тўртта ЖЧда иштирок этган бўлса, Унай учун жорий мундиал фаолиятидаги бор-йўғи иккинчисидир.

Жаҳон чемпионатларида бундан кўп «қуруқ» учрашув фақат Икер Касильясга тегишли (7 та) — у ҳам худди Субисаррета каби тўртта ЖЧда қатнашган. Икер ушбу турнирда жами 17 та ўйин ўтказган.

Симон Испания терма жамоаси сафида жами 61 та ўйинда майдонга тушган. Бу вақт ичида у 48 та гол ўтказиб юбориб, 27 бор дарвозаси дахлсизлигини сақлаб қолган. Олдинда Испанияни ЖЧ 1/16 финали доирасида Австрияга қарши ўйин кутмоқда, учрашув 2 июль куни бўлиб ўтади.